VINARS AI 11 DI SETEMBAR 2015

Vinars ai 11 di Setembar 2015, cun chê di brindâ pal inovâl dai 332 agns de vitoriose resistence europeane cuintri dal Otoman invasôr a Viene tal 1683, il Moviment Civic Culturâl Alpin-Adriatic dal Fogolâr Civic, sot dal prof. Alberto Travain, si à incuintrât li de antighe tratorie Al Chianti in Contrade dai Filipins a Udin, tal palaç dal feldmaressial furlan Carli Marie de Pâs, che in chê volte al comandave i coracîrs imperiâi inscuadrâts sul front centrâl de armade di liberazion dade dongje di Pari Marc di Davian, grant fi dal Friûl e sorecjâf morâl de leghe europeane cuintri dal Turc. Une memoreance li che no si à mancjât, par umanitât, di ricuardâ i muarts di ducj i doi esercits, chel istès marcant il valôr identitari di chê lote no dome militâr ma di civiltâts distintis e in contrast, un valôr che in chel al varès di insedâsi – si à dit e tornât a dî – juste ben il sens di une unitât de Europe, vierte, si capìs, al rispiet di une varietât di ideis e costums tal privât, ma cussiente e vuardiane des sôs primis lidrîs di union. “No dismenteâsi di chei che tal 2001 e cul stes coragjo si son butâts dentri des tors o tal mieç dai rudinaçs dal Pentangul o, ancjemò, si son ribelâts e a àn savoltât la situazion suntun avion, fasintlu sclantâ tai prâts de Pensilvanie. Vive, duncje, lis personis che a àn dade la lôr vite par judâ chei altris e par difindi une idee di Europe e di Ocident che o varessin di recuperâ!”: ve il mes di passion, in lenghe furlane, mandât pal inovâl dal zovin confradi Francesco Nicolettis, “ambassadôr” dal Fogolâr Civic di là de Manie, che al à cussì invidât a unî il ricuart de gloriose difese di Viene dal 1683 ancje cun chel dai socors tai câs plui o mancul resints di atentâts teroristics patîts dal mont ocidentâl par man di elements di stamp oltran. Clamade dibot acetade dal cenacul di popul, che il so dean prof. Travain ur à rafrescjât a ducj la memorie in cont dal impegn cjapât sù par statût di un puartâ indevant in pont culturâl un spirt di difese dal Citadin, di pacific ribalton, par travuardie di une patrie naturâl che mighe no par fuarce no coincît cun Stâts o Regjons, ma cun ideâi di comunitâts armoniosis e, duncje, in chei limits, prontis a acetâ int gnove che e rive.